FabLab

Fab Lab Reykjavík er staðsett í Fjölbrautarskólanum í Breiðholti og er hluti af skapandi samfélagi Breiðholts. Með öflugu samstarfi styður smiðjan við sköpunarkraft borgarbúa, þróar nýsköpunarhugmyndir og eflir tæknilæsi. Markmið Fab Lab er að efla nýsköpun í samfélaginu. Til að ná markmiðum okkar leggjum við áherslu á að efla nýsköpun í menntun, styðja við vöruþróun fyrirtækja og hlúa að nýjum hugmyndum hjá fólki á öllum stigum samfélagsins. Fab Lab myndar þannig skemmtilegt skapandi samfélag með fjölbreyttum hópi fólks sem á það sameiginlegt að vera forvitin, lausnamiðuð og þor til að prófa.

Nánar um FabLab

FabLab er stafræn smiðja og er stytting á enska heitinu ,,fabrication laboratory“. Markmið með smiðjunum er að hvetja einstaklinga og frumkvöðla til að láta hugmyndir sínar verða að veruleika, skapa tækifæri til vinnu við frumgerðasmíð og vöruþróun með því að bjóða upp á aðgang að stafrænum framleiðslutækjum og búnaði af ýmsum toga.

Hugmyndin að Fab Lab kemur frá þekktum uppfinninga- og vísindamanni, Neil Gershenfeld prófessor við Institude of Technology (MIT) í Massachusetts. Hugmynd hans var einföld; að bjóða upp á umhverfi, færni, háþróaða tækni og efni til að búa til hluti, á einfaldan og hagkvæman hátt hvar sem er í heiminum. Einnig að þessi möguleiki væri öllum aðgengilegur; frumkvöðlum, nemendum, listamönnum, smærri fyrirtækjum og í raun öllum sem vilja skapa eitthvað nýtt og/eða vinna að persónumiðaðri framleiðslu.

Hugmynd Gershenfeld hefur svo sannarlega orðið að raunveruleika því í dag er orðið til alþjóðlegt samstarfsnet 500 Fab Lab smiðja sem staðsettar eru víða um heiminn. Samstarfið milli smiðjanna tengir saman einstaklinga, samfélög og fyrirtæki og gefur færi á samstarfi, sameiginlegri lausnaleit og hugstormun. Þetta samstarfsnet hefur einnig dreift sér um Ísland, þar sem sjötta smiðjan var opnuð á haustmánuðum 2015.

Í Fab Lab smiðjunum gefst einstaklingum kostur á að stunda nám í Fab Academy. Námið nær yfir sex mánaða tímabil og hefst í janúar og lýkur í júní ár hvert. Inntak námsins snýr að stafrænni framleiðslu; hvernig einstaklingar geta hannað og framleitt næstum hvað sem er hafi þeir aðgang að tækjum og búnaði eins og er til staðar í öllum Fab Lab smiðjum.

Hér má finna Fab Lab sáttmálann.