Húsnæði og aðbúnaður

Skólastarfið fer fram í þremur byggingum. Við Austurberg 5 stendur aðalskólahúsið og þar er kennsla í bóknámi, listnámi og verknámi. Við Hraunberg 6 stendur verknámshús þar sem fer fram verkleg kennsla í trésmíði og myndlist. Við Austurberg 3 stendur íþróttahúsið sem þjónar nemendum Fjölbrautaskólans í Breiðholti og Hólabrekkuskóla. Í húsinu er löglegur handboltavöllur, fjórir körfuboltavellir, átta badmintonvellir, fjórir blakvellir og einn tennisvöllur.

FB rekur innan sinna veggja FabLab-smiðju í samstarfi við Nýsköpunarmiðstöð Íslands og Reykjavíkurborg. Þar gefst nemendum og almenningi kostur á að útbúa frumgerðir af hlutum sem þeir hafa teiknað og raungera þannig hugmyndir sínar með hjálp stafræns tækjabúnaðar eins og þrívíddarprentara, laserskera, fræsara og tölvuteikniforrita. Sífellt fleiri kennarar í FB nýta aðstöðuna í FabLab til að dýpka og víkka nám nemenda.

Í skólanum er þráðlaust net sem bæði kennarar og nemendur hafa aðgang að. Í skólanum eru átta tölvustofur og nokkrir fartölvuvagnar auk tölva á bókasafni. Á bókasafni er líka hægt að fá fartölvu lánaða í staka tíma. Mælst er til þess að nemendur mæti með sínar eigin fartölvur í skólann. Allar upplýsingar um námsferil nemenda eru skráðar í Innu. Nemendur geta sótt lykilorð að Innunni gegnum tölvupóst. Skólinn er áskrifandi að Office 365 og geta nemendur hlaðið þeim forritum niður á tölvur sínar. Í upphafi annar fá nemendur sendar upplýsingar um lykilorð að Innu og upplýsingar um aðgang að tölvukerfi skólans og Office pakkanum.

Mötuneyti fyrir nemendur og starfsfólk eru rekin í skólanum. Matsalur nemenda er í nýbyggingu skólans. Skólinn leggur áherslu á notalegan aðbúnað í matsölum og að í boði sé hollt fæði á hagstæðu verði. Þá býður skólinn nemendum sínum hafragraut á morgnana.

Kappkostað er að hlúa eins vel að nemendum og starfsfólki og frekast er unnt innan ramma þess fjármagns sem skólanum er úthlutað. Viðhald og endurnýjun á húsnæði skólans er í höndum Fasteigna ríkissjóðs í samráði við stjórnendur. Tækjabúnaður skólans er í stöðugri uppfærslu, en verknámskennsla kallar á góðan tækjabúnað. Húsbúnaður er kominn til ára sinna og reynt að endurnýja hann eftir því sem kostur er á. Lögð er áhersla á gott viðhald á eignum og búnaði, góða umgengni og snyrtileika í rýmum skólans.