Í áfanganum er farið í sögulegt ágrip rafrænnar háreyðingar og þróun varðandi rafstraum og tækni sem notuð er við hana. Nánar er farið yfir líffæra- og lífeðlisfræði hárs og húðar, auk húðsjúkdóma með tilliti til rafrænnar háreyðingar. Nemendur læra um uppbyggingu og eiginleika húðar, kirtla hennar og ónæmiskerfi, og innkirtlastarfsemi líkamans. Þeir þekkja uppbyggingu hárs og hárslíðurs. Þeir þekkja algengustu húðsjúkdóma með tilliti til rafrænnar háreyðingar, með- og mótrök fyrir meðferð.
Farið er í ólíkar aðferðir við rafræna háreyðingu. Lögð er áhersla á að nemendur tileinki sér rétt vinnubrögð við verkþætti og hafi þekkingu á undirbúningi og eftirmeðferð húðar. Í áfanganum læra nemendur um mikilvægi hreinlætis og sótthreinsunar húðar, nála, áhalda og tækja. Þeir kynnast notun nála við rafræna háreyðingu og geta borið saman kosti aðferðanna og galla.