Dreifnám í Sumarskólanum í FB

Sumarskólinn í FB býður upp á nokkra áfanga í svokölluðu dreifnámi. Dreifnámið er þannig uppbyggt að nýttir eru allir helstu kostir fjarnáms auk þess sem nemendur hafa aðgang að kennara sínum á ákveðnum tímum. Nýjasta tækni í vefumsjón og tölvusamskiptum er notuð til að gera námið aðgengilegt. Þannig verða verkefni sett inn á sérstakt námsstjórnunarkerfi sem nemendur fá aðgang að og þangað sækja nemendur verkefnin og skila einnig. Þá er í kerfinu að finna rafrænan vettvang fyrir umræður og innlegg þar sem nemendur geta skipst á skoðunum undir leiðsögn kennara. Síðan eru settir inn sérstakir viðtalstímar þar sem nemendur gætu þurft að mæta. Þar verður farið yfir stöðuna í áfanganum, málin rædd og t.d. tekin minni próf. Boðið er upp á tæplega 40 áfanga í dreifnámi í Sumarskólanum í FB. Þeir áfangar sem boðnir eru þykja henta sérlega vel til dreifnáms. Að auki er möguleiki á að fleiri áfangar bætist við. Þá er einkum átt við áfanga þar sem þátttaka verður ekki nægilega mikil til þess að halda úti hefðbundinni kennslu. Það er von skólayfirvalda Sumarskólans í FB að nemendur taki þessari nýbreytni vel og nýti þannig saman hefðbundið nám og nýjustu upplýsingatækni. Boðið hefur verið upp á nám af þessu tagi í Sumarskólanum í FB sl. sumur með mjög góðum árangri.