Námsmat einkunnir og próf

Námsmat

Námsmati er ætlað að meta hvernig nemanda hefur gengið að tileinka sér námsmarkmið hvers áfanga. Í kennsluáætlunum kemur fram hvernig námsmati er háttað og er það breytilegt eftir eðli áfanganna.

Einkunnir

Einkunnir eru gefnar í heilum tölum frá 1 til 10.
Einkunnin 10 vísar til þess að 95 -100% markmiða hafi verið náð.
9 85–94% 6 55–64% 3 25–34%
8 75–84% 5 45–54% 2 15–24%
7 65–74% 4 35–44% 1 0–14%

Lágmarkseinkunn í áfanga er 5. Nemandi telst ekki hafa staðist áfanga þegar einkunn er lægri og fær því ekki að taka næsta áfanga á eftir.

Nemanda er heimilt að útskrifast með einkunnina 4 (D) ef um lokaáfanga eða stakan áfanga er að ræða. Ekki er heimilt að hafa fleiri en tvær slíkar einkunnir á lokaprófsskírteini. Þessir áfangar gefa ekki einingar og verður nemandi því að afla annarra eininga í stað þeirra.

Próf

Hverri námsönn lýkur með prófum. Við próf er farið eftir ákveðnu skipulagi og um þau gilda sérstakar reglur sem mikilvægt er að fylgja.

Skipulag prófa

  1. Drög að próftöflu liggi fyrir í 7. viku annar.
  2. Endanleg próftafla er gefin út a.m.k. fjórum vikum fyrir annarpróf og sett inn á heimasíðu skólans á áberandi stað og auglýst á skjá.
  3. Nemandi, sem þarf að þreyta þrjú próf sama daginn eða tvö próf á sama tíma, getur skráð sig í aukapróf án endurgjalds á skrifstofu skólans.
  4. Aukapróf eru haldin næsta virkan dag eftir að annarprófum lýkur, á sama tíma dagsins og viðkomandi dagskólapróf var í próftöflu.
  5. Þeir sem veikjast í prófum geta tekið próf á aukaprófsdegi gegn framvísun læknisvottorðs. Þeim ber að tilkynna veikindin samdægurs eða næsta virkan dag eftir viðkomandi próf og eru þeir þá skráðir í aukapróf.
  6. Þeir sem óska eftir að flytja próf yfir á aukaprófsdag án veikinda mega skrá sig í aukapróf á skrifstofu skólans fyrir ákveðinn, auglýstan dag gegn gjaldi.

Prófreglur

  1. Prófstjóri, viðkomandi fagstjóri og yfirsetukennari bera ábyrgð á því að prófreglum sé fylgt.
  2. Próf hefjast og þeim lýkur stundvíslega við hringingu. Próftími getur verið ein til fjórar klukkustundir.
  3. Nemendum, sem mæta 10 mínútum eftir að próf hefst, skal vísa til prófstjóra.
  4. Nemendum má ekki hleypa út úr prófstofu fyrr en eftir að 30 mínútur eru liðnar.
  5. Nemendur skulu hafa persónuskilríki tiltæk þannig að kennari geti kannað þau og skrá sig á sérstakan viðverulista sem yfirsetukennari leggur fyrir þá.
  6. Skólinn leggur til pappír og prófverkefni en nemendur ritföng og önnur leyfileg hjálpargögn. Ekkert má fá lánað nema með milligöngu kennara.
  7. Vanda skal skrift og frágang á prófúrlausnum og þær skulu merktar fullu nafni og kennitölu.
  8. Ekkert skal vera á borði nemenda nema skriffæri og leyfileg hjálpargögn.
  9. Nemendum ber að taka ofan hettur og húfur áður en sest er að prófi.
  10. Töskur, pokar, símar, tónhlöður (iPod) og þess háttar tæki eru stranglega bönnuð í prófum og skulu geymd á sérstöku borði í prófstofu.
  11. Salernisferðir nemenda í prófum skal leysa með utanaðkomandi hjálp.
  12. Nemendur geta sótt um lengri próftíma hjá námsráðgjöfum innan auglýsts frests vegna fötl-unar, veikinda eða sértækra námsörðugleika.
  13. Fagstjóri ber ábyrgð á því að lengd prófa sé í samræmi við þann tíma sem gefinn er til prófs-ins.
  14. Við skrifleg próf má nota þau gögn ein sem forsenda prófsins leyfir. Nemanda, sem notar óleyfileg gögn eða veitir eða þiggur hjálp við próf umfram það sem heimilað er, er vísað úr prófi með tilstyrk prófstjóra. Fjallað verður um mál hans af yfirvöldum skólans.
  15. Sérhver nemandi ber ábyrgð á því að yfirsetumenn hafi ekki ástæðu til að ætla að hann muni brjóta ofanskráð ákvæði. Vanþekking á reglum leysir nemendur ekki undan ábyrgð.

Frávik frá prófreglum

Nemendur sem eiga við fötlun og/eða sértæka námsörðugleika að stríða, eiga eftir aðstæðum, rétt á sérstakri aðstoð við nám, próf og annað námsmat. Námsráðgjafar, að fenginni umsögn sérfræðinga, leggja mat á möguleika og leiðir skólans til þess að mæta þörfum hlutaðeigandi nemenda.
Fatlaðir og langveikir nemendur, nemendur með lesröskun (lestrar- eða skriftarörðugleika) og/eða aðra staðfesta skynjunarörðugleika geta sótt um frávik frá hefðbundnu námsmati. Þar getur m.a. verið um að ræða sérstaka samsetningu prófa, lengri próftíma, sérhönnuð próf, notkun hjálpargagna, aðstoð í prófum, munnleg próf o.fl.

Prófsýning

Kennurum er óheimilt að gefa nemendum upp einkunnir fyrr en á afhendingardegi einkunna. Sama dag og einkunnir eru afhentar skulu nemendur eiga þess kost að skoða prófúrlausnir sínar í viðurvist kennara. Prófsýning skal vera ein og hálf klst. í dagskóla og ein klst. í kvöldskóla. Ef fram kemur skekkja í mati eða einkunnagjöf skal slíkt leiðrétt.
Ef nemandi telur einkunnagjöf kennara ósanngjarna á hann rétt á að vísa málinu til fagstjóra. Ef ekki tekst að leysa ágreininginn er málinu vísað til skólameistara sem hlutast þá til um, að höfðu samráði við sviðstjóra, að hlutlaus prófdómari meti úrlausn nemandans. Úrskurður prófdómara skal gilda.

Endurtektarpróf

Ef fall í einum áfanga á lokaönn kemur í veg fyrir að nemandi geti útskrifast má hann endurtaka próf í þeim áfanga. Nemandinn öðlast ekki þennan rétt fyrr en ljóst er að hann hafi náð fullnægjandi árangri í öðrum áföngum á lokaönn.
Nemendur eiga ekki rétt á endurtektarprófi í símatsáföngum ef í áfangalýsingu eða kennsluáætlun, sem nemendur fá í upphafi annar, er skýrt tekið fram að námsmatið byggist á símati sem nemendur verði að standast.