Málabraut

Blindur er bóklaus maður Málabraut í Fjölbrautaskólanum í Breiðholti er ætlað að veita nemendum góða, almenna undirstöðuþekkingu í bóklegum greinum með áherslu á erlend tungumál, s.s. ensku, dönsku, spænsku og þýsku. Brautin býr nemendur undir framhaldsnám í háskóla, einkum þar sem gerð er krafa um góða tungumálamenntun. Nám á málabraut er skipulagt sem 8 anna nám og því lýkur með stúdentsprófi. Námið skiptist í kjarna, kjörsvið og frjálst val. Kjarninn er sameiginlegur öllum stúdentsprófsbrautunum og inniheldur 98 einingar. Kjörsviðið er 30 einingar en þar eiga nemendur að velja sér minnst 3 námsgreinar til að dýpka þekkingu sína. Algengast er að nemend-ur á málabraut velji sér kjörsviðsáfanga í íslensku, ensku, dönsku, spænsku, þýsku og latínu. Stúdentspróf af málabraut er heppilegur undirbúningur fyrir háskólanám í hugvísindum, einkum íslensku, bókmenntafræði, erlendum tungumálum, sagnfræði og heimspeki. Margir nemendur af málabraut hafa farið í kennaranám eða lagt fyrir sig einhvers konar ferðamálafræði til þess að starfa á ferðaskrifstofum eða í móttökum hótela eða orðið leiðsögumenn, flugfreyjur og flugþjónar.