Skólanámskrá

1. Fjölbrautaskólinn í Breiðholti Fjölbrautaskólinn í Breiðholti hóf starf­semi sína 4. október árið 1975. Fjölbrautaskólinn í Breiðholti var fyrsti fjölbrautaskólinn á Íslandi. Frá stofnun hefur skólinn verið í fararbroddi við nýjungar í skólastarfi á Íslandi. Kennsla og skipulag skólans byggist á áfan­gakerfi og fjölbreyttu framboði námsleiða. Markmið skólans hefur verið að tengja saman bóknám, verknám og listnám innan skólans, þar sem lögð er áhersla á að samnýta áfanga og gera öllum námsgreinum jafn hátt undir höfði. Fjölbrautaskólinn í Breiðholti hefur frá upphafi verið í forystu framhaldsskóla og lagt til mikilsverðar nýjungar í skólastarfi á Íslandi. Í ársbyrjun 1981 var Kvöldskóli FB stofnaður. Fjölbrautaskólinn hafði frumkvæði að stofnun sumarskóla þar sem skipuleg kennsla samkvæmt skólanámskrá skólans var útfærð yfir sumartímann. 1.1 Hlutverk framhaldsskóla og sérstaða Fjölbrautaskólans í Breiðholti Hlutverk f­ramhaldsskóla er skilgreint í framhaldsskólalögunum sem sett voru á Alþingi ár­ið 1996. Þar segir eftirfarandi um almennt hlutverk framhaldsskóla: - að stuðla að alhliða þroska allra nemenda svo að þeir verði sem best búnir undir að taka virkan þátt í lýðræðis­þjóðfélagi - að búa nemendur undir störf í atvinnulífinu og frekara nám - að leitast við að efla ábyrgðarkennd, víðsýni, frum­kvæði, sjálfstraust og umburðalyndi nemenda - að þjálfa nemendur í öguðum og sjálf­stæðum vinnubrögðum og gagnrýninni hugsun - að kenna þeim að njóta menningarlegra verðmæta og hvetja til stöðugrar þekkingarleitar Markmið skólans eins og annarra framhaldsskóla er bundið í lögum, reglugerðum, reglum og aðalnámskrá framhaldsskóla. Skólinn býður upp á fjölbreytt nám á fram­haldsskólastigi og höfðar til mjög margra og ólíkra hópa. Námsframboð skólans er svipað í dag- og kvöldskóla. Skólinn leitast við að þjóna nemendum og bjóða fram fjöl­breytt nám sem höfðar til mjög fjölbreytilegs nemendahóps. Í boði er metnaðarfull hraðleið til stúdentsprófs fyrir góða námsmenn, almennt bóknám með fjölbreytilegu sjálfsvali nemenda á kjörsviðsgreinum bóknámsbrautanna, upplýsinga- og tækninám, list­nám og verknám sem uppfyllir kröfur og þarfir atvinnulífs eins og best verður á kosið. Fjölbrautaskólinn í Breiðholti hefur einnig lagt grundvöll að mjög farsælu starfi í sérdeildum fyrir fatlaða. Námsbrautir skólans fylgja skipulagi og markmiðum aðal­nám­skrár framhaldsskóla en skólinn nýtir sér það svigrúm sem aðalnámskrá heimilar. Náms­brautir starfsnáms eru í sífelldri endurskoðun og mega nemendur gera ráð fyrir því að námskrár breytist á námstímanum. Almennt gildir sú regla að nemendur fylgja þeirri námskrá sem þeir innritast eftir – nema um annað sé samið. Fjölbrautaskólinn í Breiðholti leggur á það áherslu að áfanga- og fjölbrautakerfið fái að njóta sín eins og kostur er nemendum til framdráttar og hagsbóta í áframhaldandi námi og störfum. Í Fjölbrautaskólanum í Breiðholti er lögð áhersla á að bjóða fram starfskrafta og þjón­ustu vel menntaðs starfsfólks. Skólinn leggur áherslu á öflugt umsjónarstarf með nem­endum, skilvirka upplýsingastefnu þar sem allt starfsfólk skólans, nemendur og for­eldrar þeirra eiga greiðan aðgang að mikilvægum upplýsingum um skólastarfið, fag­lega náms- og starfsráðgjöf, skilvirkt forvarnastarf og foreldrasamstarf. Skólinn leggur áherslu á að meta skólastarfið á skilvirkan hátt með áherslu á að auka gæði starfsins eins og best verður á kosið. Almennan­ fyrirvara verður að gera á möguleikum skólans til þess að sinna öllum verkefnum á þann hátt sem hann kýs þar sem svigrúm skólans er háð fjárveitingum og aðstöðu sem honum er búinn. Stefna Fjölbrautaskólans í Breiðholti er að: - bjóða nemendum sínum faglega og góða kennslu - skapa nemendum góð skilyrði til náms - undirbúa nemendur undir frekara nám - undirbúa nemendur undir krefjandi störf í atvinnulífi - gera kröfur til nemenda um ástundun og ræktarsemi í námi - auka metnað nemenda og hvetja þá til þess að ná góðum árangri í námi - stuðla að auknum þroska hvers einstaklings með því að bjóða fram viðfangsefni við hæfi – eins og kostur er - auka hæfni nemenda til sjálfstæðra og vandaðra vinnubragða - efla með nemendum gagnrýna og skapandi hugsun - efla áhuga og skilning nemenda á umhverfi sínu og samfélagi og hvetja þá til þátttöku í lýðræðislegu starfi - glæða skilning og áhuga nemenda á þjóðlegum og menningarlegum verðmætum - rækta með nemendum vilja til að eiga jákvæð samskipti við aðra og sýna þeim tillitssemi og umburðarlyndi Í Fjölbrautaskólanum í Breiðholti er lögð áhersla á að þjóna mjög breiðum hópi nemenda og bjóða fjölbreytt nám: - Bóknámsbrautir til stúdentsprófs – úrval kjörsviðsgreina - Upplýsinga- og tæknibraut til stúdentsprófs - Listnámsbraut með myndlistakjörsviði. - Listnámsbraut með textíl- og hönnunarkjörsviði. - Húsasmíði - Rafvirkjun - Sjúkraliðabraut - Snyrtibraut - Handíðabraut - Viðskiptabraut - Fjölbreytilegt viðbótarnám til stúdentsprófs að loknu list- og verknámi - Almenna námsbraut - Starfsbraut fyrir fatlaða nemendur 1.2 Leiðarljós skólans Fjölbrautaskólinn í Breiðholti byggir á áfanga- og fjölbrautakerfi. Öllum náms­greinum skólans er skipt í áfanga sem hafa skilgreind markmið. Námsmatið byggir á upp­lýsandi skilaboðum til nemenda og lýsingu á því að hve miklu leyti þeir hafa náð að tileinka sér markmið skólanámskrár. Námsmat byggir á markmiðum náms og fá nem­endur upplýsingar um skipulag náms, námskröfur og námsmat í kennsluáætlunum sem þeir fá afhentar í byrjun námsannar í sérhverjum námsáfanga. Skólinn leggur áherslu á ábyrgð nemenda í námi og leitast við að upplýsa og leiðbeina þeim eins og kostur er. Inntökuskilyrði eru sett á námsbrautir skólans en nemendur velja sjálfir náms­leiðir eftir áhugamálum, mark­miðum og hæfileikum hvers og eins innan þess ramma. Skólinn býður fram þriggja ára nám til stúdentsprófs fyrir hraðfara og duglega nemendur. Almenn námsbraut er ætluð þeim sem þurfa nánari undirbúning fyrir nám í framhaldsskóla. Nemendum sem snýst hugur um námsleið geta á tiltölu­lega auð­veldan hátt skipt um náms­braut. Skólinn aðstoðar nemendur við að skipu­leggja við­bótar­nám til lokaprófs. Áfangakerfið gerir nemendum auðveldara að stjórna náms­­hraða sínum þar sem þeir geta að nokkru leyti ráðið þeim eininga­fjölda sem þeir taka og í sumum greinum er boðið upp á hrað­ferð og hægferð í sam­ræmi við frammi­stöðu nemenda. Auk þess gerir áfanga­kerfið nem­­endum auðveldara að ljúka námi á fleiri en einni námsbraut. Skólinn leggur áherslu á að byggja upp sjálfstæða ein­staklinga sem bera ábyrgð á námsvali sínu en leitast jafnframt við að styðja og styrkja þá eins og kostur er m.a. með öflugu umsjónarstarfi. Skólinn býður upp á þjónustu hjúkrunarfræðings, forvarnafulltrúa, félagsráðunauta og samstarf við for­ráða­menn. 1.3 Kennsluhættir Fjölbrautaskólinn í Breiðholti er fjölbreyttur skóli og kennslugreinar fjölmargar, bæði bóklegar og verklegar. Kennsluhættir eru mismunandi eftir viðfangsefnum og nem­enda­hópum. Kennsludeildir og kennarar meta aðstæður og velja kennsluaðferðir sem henta viðfangsefni og markmiðum náms á hverjum tíma. Í Fjöl­brautaskólanum í Breiðholti er lögð áhersla á fjölbreytilegar kennsluaðferðir og uppbrot kennslustunda með það að markmiði að auka áhuga og virkni nemenda í námi. Kennsluaðferðir þurfa að taka mið af umhverfi og áherslum á hverjum tíma. Góðir kennsluhættir vekja áhuga nemenda á námi en letja þá ekki. Kennslu skal haga í samræmi við stefnu skólans. Nemendur skal hvetja til dáða með hæfilegri ögrun og hvatningu. Skólinn telur að samkeppni og námsagi séu nemendum nauðsynlegt veganesti fyrir framhaldsnám, vinnu og daglegt líf. Stefna Fjölbrautaskólans í Breiðholti hvað varðar kennsluhætti er: - að veittar séu skýrar upplýsingar um áherslur og kröfur í náminu - að notaðar séu fjölbreyttar kennsluaðferðir - að kennarar veiti góða verkstjórn og glæði áhuga nemenda á námi - að nemendum sé gefin uppbyggileg endurgjöf við frammistöðu sinni svo fljótt sem auðið er - að stuðlað sé að góðri samvinnu nemenda - að stuðlað sé að góðri samvinnu kennara og nemenda - að upplýsingatækni sé nýtt í öllum námsgreinum þar sem það á við - að nemendum sé tamin virðing fyrir menningu, sögu og náttúru landsins - að nemendum sé tamin virðing fyrir móðurmálinu og vandvirkni í meðferð þess - að nemendur fái þjálfun í að koma fram og tjá sig - að nemendur séu hvattir til góðra og sjálfstæðra vinnubragða 1.4 Áfanga- og annakerfi Fjölbrautaskólinn í Breiðholti starfar eftir áfangakerfi og er skólaárinu skipt í tvær átján vikna námsannir. Haustönn hefst 20. ágúst og lýkur með prófum í desember. Vorönn hefst í byrjun janúar og lýkur með prófum í maí. Öllu námi er skipt í áfanga sem hafa mismunandi vægi eða einingar. Einingarnar miðast yfirleitt við kennslustundafjölda í áfanga og er meginreglan sú að ein eining jafngildir tveimur kennslustundum á viku í eina önn þannig að sex kennslu­stundir á viku gefa að jafnaði þrjár einingar o.s.frv. Áfangaheiti er þrír bókstafir og fjögurra stafa tala. Fyrsti tölustafurinn segir til um röð áfanga innan greinarinnar, annar greinir hliðstæða áfanga hvern frá öðrum, sá þriðji gefur einingafjölda áfangans og sá fjórði kennslu­stundafjölda. Út úr áfangaheitinu ÍSL 1024 má þannig lesa að þetta sé fyrsti áfangi í íslensku, hann gefi tvær einingar og kennt sé fjórar kennslustundir á viku. Starfstími kvöldskóla er í aðalatriðum sami og í dagskóla. Kennslustundir í kvöld­skóla eru þó færri. Meginreglan er sú að ein eining í kvöldskóla jafngildir einni kennslu­­stund í eina námsönn, þrjár einingar jafngilda þremur kennslustundum o.s.frv. 1.5 Inntökuskilyrði Í almennum hluta aðalnámskrár fyrir framhaldsskóla er rætt um inntökuskilyrði í fram­­haldsskóla og í framhaldi af því gilda eftirfarandi reglur um inngöngu í dagskóla Fjöl­brauta­skólans í Breiðholti: Almenn námsbraut Nemandi hefur lokið grunnskóla­prófi og hefur valið sig frá samræmdum prófum við lok grunnskóla. Hann uppfyllir ekki inntöku á aðrar námsbrautir FB. Brautin hentar einnig fyrir óráðna nemendur. Starfsbraut – sérdeild Sérbraut fyrir fatlaða nemendur sem hafa fengið námsmat í grunnskóla í samræmi við 48. gr. laga um grunnskóla 1995. Félagsfræðabraut Samræmdu prófi í ensku, íslensku og stærðfræði skal vera lokið. Meðaltal einkunna skal almennt vera 6,0 – í stærð­fræði að lágmarki 5,0. Auk þess gildir eftir­farandi: Meðaltal einkunna úr samræmdu prófi og skólaeinkunnar skal vera að lágmarki: enska 6,0; íslenska 6,0; stærðfræði 5,0 Skólaeinkunn í samfélagsgreinum skal að lágmarki vera 6,0. Lág­markseinkunn á samræmdu prófi er 5,0 í viðkomandi greinum. Málabraut Samræmdu prófi í norðurlandamáli, ensku, íslensku og stærðfræði skal vera lokið. Auk þess gildir eftirfarandi: Meðaltal einkunna úr samræmdu prófi og skólaeinkunnar skal vera að lágmarki: danska 6,0; enska 6,0; íslenska 6,0; stærðfræði 5,0. Lágmarkseinkunn á sam­ræmdum prófum er 5,0 í viðkomandi greinum. Náttúrufræðibraut Samræmdu prófi í ensku, íslensku, náttúru­fræði og stærðfræði skal vera lokið. Auk þess gildir eftirfarandi: Meðaltal einkunna úr samræmdu prófi og skólaeinkunnar skal vera að lágmarki: enska 5,0; íslenska 6,0; stærðfræði 6,0; náttúrufræði 6,0. Lágmarks­einkunn á samræmdum prófum er 5,0 í viðkomandi greinum. Upplýsinga- og tæknibraut Samræmdu prófi í ensku, íslensku, náttúrufræði og stærðfræði skal vera lokið. Auk þess gildir eftirfarandi: Meðaltal einkunna úr samræmdu prófi og skóla­einkunnar skal vera að lágmarki: enska 5,0; íslenska 6,0; stærðfræði 6,0; náttúrufræði 6,0. Lágmarkseinkunn á samræmdum prófum er 5,0 í viðkomandi greinum. Húsasmíði og rafvirkjun Samræmdu prófi skal vera lokið í íslensku og stærð­fræði að lágmarki með einkunninni 5,0. Meðaltal einkunna úr samræmdu prófi og skólaeinkunnar skal vera að lágmarki: íslenska 6,0; stærðfræði 6,0. Listnámsbraut Samræmdu prófi skal vera lokið í íslensku og stærð­fræði að lágmarki með ­einkunninni 5,0. Meðaltal einkunna úr samræmdu prófi og skólaeinkunnar skal vera að lágmarki: íslenska 6,0; stærðfræði 6,0. Nemendur á listnámsbraut verða auk þess að hafa lokið myndmennta­greinum í grunnskóla með skóla­einkunn ekki lægri en 6,0. Sjúkraliða- og snyrtibraut Samræmdu prófi skal vera lokið í íslensku og stærð­fræði að lágmarki með ­einkunninni 5,0. Meðaltal einkunna úr samræmdu prófi og skólaeinkunnar skal vera að lágmarki: íslenska 6,0; stærðfræði 6,0. Viðskiptabraut Samræmdu prófi skal vera lokið í íslensku og stærð­fræði að lágmarki með ­einkunninni 5,0. Meðaltal einkunna úr samræmdu prófi og skólaeinkunnar skal vera að lágmarki: íslenska 6,0; stærðfræði 6,0. Handíðabraut Samræmdu prófi skal vera lokið í íslensku og stærð­fræði að lágmarki með ­einkunninni 5,0. Meðaltal einkunna úr samræmdu prófi og skólaeinkunnar skal vera að lágmarki: íslenska 6,0; stærðfræði 6,0. Nemendur á handíðabraut verða auk þess að hafa lokið myndmennta­greinum í grunnskóla með skólaeinkunn ekki lægri en 6,0. Íþróttabraut Samræmdu prófi skal vera lokið í íslensku og stærð­fræði að lágmarki með ­einkunninni 5,0. Meðaltal einkunna úr samræmdu prófi og skólaeinkunnar skal vera að lágmarki: íslenska 6,0; stærðfræði 6,0. 1.6 Nánar um inntökuskilyrði í Fjölbrautaskólann í Breiðholti Nemendur sem fullnægja inntökuskilyrðum þeim sem talin eru upp hér að framan hafa forgang að innritun á viðkomandi námsbraut. Skólameistari velur nemendur inn í skólann og hefur heimild til þess að víkja frá reglum um inntöku í framhaldsskóla ef hann telur líkur á því að þeir standist þær kröfur sem gerðar eru um námsárangur á viðkomandi námsbraut. Auk þess er skólameistara heimilt skv. 15. gr. laga um fram­haldsskóla að veita nemanda, sem orðinn er 18 ára gamall, inngöngu á einstakar brautir framhaldsskóla þótt hann uppfylli ekki lágmarkskröfur um námsárangur við lok grunnskóla. Vilji nemandi tryggja sér rétt til náms á öllum námsbrautum þarf hann að ná við­mið­un­ar­­einkunn í öllum námsgreinum í samræmdum prófum við lok grunnskóla. Umsóknir um skólavist skulu hafa borist skólanum innan auglýsts tíma hverju sinni. Innritað er á haustannir í byrjun júní ár hvert og umsóknir um náms­vist á vorönnum verða að hafa borist skólanum fyrir októberlok. Umsóknir um starfsbraut skólans þurfa að berast kennslustjóra starfsbrautar mun fyrr og er það auglýst sérstaklega. Kvöldskóli FB er opinn öllum einstaklingum nítján ára og eldri og fer innritun í hann fram í upphafi hverrar annar. Inntökuskilyrði á námsbrautir kvöldskólans gilda ekki með sama hætti og í dagskólanum enda nemendur í kvöldskóla á eigin forsendum. Vakin er athygli á nauðsynlegum undirbúningi fyrir efri námsáfanga í öllum greinum og að reglur um undanfara séu virtar. 1.7 Nám metið úr öðrum skólum Við skólann starfar matsnefnd sem metur nám úr öðrum skólum til eininga eftir frumgögnum viðkomandi skóla og er það fellt að námskerfi FB eftir því sem kostur er. Nám úr öðrum skólum er metið þannig að einkunn helst óbreytt. Mats­hæft telst nám að loknu grunnskólaprófi sem hefur skilgreind markmið og lýkur með námsmati og fullnægjandi árangri. Þar er um að ræða allt viðurkennt nám á fram­haldsskólastigi, nám sem veitir starfsréttindi, viðurkennd námskeið, hliðstætt nám erlendis o.fl. Metnir áfangar færast inn á námsferil nemandans og koma fram á einkunnablaði í lok hverrar annar. Skólinn innheimtir gjald fyrir námsmat bæði í dagskóla og kvöldskóla. 1.8 Mismunandi námshraði Byrjunaráfanga í íslensku, stærðfræði, dönsku og ensku má taka á mismunandi hraða. Nemandi, sem hefur hlotið einkunnina 8,5 eða þar yfir í þessum greinum á grunnskóla­prófi, getur farið í hraðferð þar sem unnt er að ljúka námsefni tveggja fyrstu áfang­anna (1024 og 1224/2024) í einum áfanga (1046), þ.e. með sex kennslustundum á viku í eina önn. Nemandi með einkunnina 5 eða 6 í sömu greinum þarf að taka hægferð þar sem námsefni fyrsta áfangans (1024) er tekið á sex kennslustundum á viku (1026) í stað fjögurra. Nemandi með einkunn lægri en 5 á grunnskólaprófi í stærðfræði og/eða íslensku þarf að taka námsáfanga á almennri námsbraut dæmi ÍSL 0936, STÆ 0936. Standist hann próf í áfang­anum má hann fara í byrjunaráfanga. 1.9 Hraðleið – náttúrufræðibraut á þremur árum Fjölbrautaskólinn í Breiðholti leggur áherslu á að sinna öllum nemendum eins og best verður á kosið. Ein af þeim leiðum er að bjóða nemendum sem hafa náð góðum árangri á samræmdum prófum við lok grunnskóla að ljúka náttúrufræðibraut á þremur árum. Nemendur sem innritast á brautina verða að uppfylla skilyrði um eftirfarandi lágmarkseinkunnir á samræmdu prófi: stærðfræði 8,0; enska 9,0; náttúrufræði 9,0; íslenska 8,0. Nemendur á brautinni hafa sérstakan umsjónarkennara sem leiðbeinir þeim um námsval, skipulag vinnubragða og efnistök í námi. 1.10 Utanskólanám - P-áfangar Nemandi, sem fær einkunnina 8 eða hærri í áfanga sem tekinn er í FB og stendur að öðru leyti vel í námi, getur sótt um að stunda nám í næsta áfanga fyrir ofan án tímasóknar. Nauðsynlegt er að sækja um P-áfangaheimild í námsgreininni til skólaráðs á eyðublöðum sem fást á skrifstofu skólans. Umsóknir um P-áfanga skulu berast skólaráði í síðasta lagi í fyrstu kennslu­viku annarinnar. Skólaráð setur nánari reglur um P-áfanga. Aldrei skulu P-áfangar samtímis nema meira en 6 einingum, nema á síðustu önn nem­andans ef aðstæður bjóða ekki upp á aðra möguleika. Hægt er að fá P-heimild ef það er eina leiðin til þess að útskrift nemanda fái staðist. Líkur á útskrift þurfa að vera raunhæfar. Skólaráð er heimilt að veita undanþágu frá þessum reglum ef sérstaklega stendur á. Til að fá heimild til P-áfanga verða nemendur að hafa fengið einkunnina 8 eða hærri í a.m.k. 6 einingum á önninni á undan að frádregnum einingum þeirra áfanga sem nem­andinn hefur fallið í eða ekki mætt í próf í. Nemendur í P-áfanganámi skulu hafa samband við kennslustjóra í upphafi annar og standa skil á verkefnum og prófum á sama tíma og með sömu skilyrðum um náms­árangur og aðrir nemendur. Í upphafi annar gera nemandi og kennari með sér skrif­legan samning um tilhögun námsins. 1.11 Erlend tungumál Á flestum námsbrautum er skylt að leggja stund á þrjú erlend tungumál til stúdents­prófs, eitt Norðurlandamál (dönsku, norsku eða sænsku), ensku og þriðja mál. Sem þriðja tungumál má velja spænsku eða þýsku. Á málabraut bætist við fjórða málið og stendur valið þar á milli sömu tungumála. Kennsla í norsku og sænsku fer ekki fram á vegum skólans. Aðeins eitt Norðurlandamál fæst metið til lokaprófs. 1.12 Stöðupróf Tilgangur stöðuprófa er að gera viðkomandi kleift að sanna þekkingu sína í tiltekinni grein eða á tilteknu sviði. Með þessum hætti geta nemendur fengið viðurkennda þekkingu og reynslu sem þeir búa yfir og ekki hefur verið aflað með hefðbundnum hætti í skóla og stytt þannig námstíma sinn til lokaprófs. Þeir sem ganga undir stöðu­próf greiða sannanlegan kostnað vegna prófanna. Menntamálaráðuneytið felur fram­halds­skóla/um framkvæmd stöðuprófa samkvæmt nánari auglýsingu. Stöðupróf eru haldin a.m.k. einu sinni á ári í bóklegum og verklegum greinum eftir því sem tilefni er til. 1.13 Undanþágur Fatlaðir nemendur og nemendur með lesröskun (lestrar- og skriftarörðugleika) og/eða aðra staðfesta skynjunarörðugleika geta sótt um undanþágu til skólameistara frá ein­stökum námsáföngum enda sé fullreynt að mati skólameistara að nemandinn geti ekki náð tökum á námsefninu vegna skilgreindra annmarka sem sérfræðingur á viðkom­andi sviði hefur staðfest. Nemendur skulu þó taka aðra áfanga í stað þeirra sem þeir fá undan­þágu frá. Nemendur geta einnig sótt um undanþágu til skólameistara frá einni námsgrein ef þeir eiga við það mikla námsörðugleika að stríða að þeir geta ekki náð tökum á náms­efninu þrátt fyrir endurteknar tilraunir og þrátt fyrir sérstaka aðstoð. Slíkir náms­örðugleikar skulu staðfestir af sérfræðingi á viðkomandi sviði. Nemendur sem fá und­an­þágu samkvæmt þessu skulu þó taka aðra grein í staðinn. Nemendur, sem hafa annað móðurmál en íslensku, og íslenskir nemendur, sem hafa dvalið lengi erlendis og hafa þar af leiðandi takmarkaða kunnáttu í málinu, geta sótt um að stunda nám í íslensku samkvæmt sérstakri námskrá sem ætluð er þessum nem­endum. Sama gildir um heyrnarlausa nemendur. Hafi viðkomandi nemandi dvalið utan Norðurlanda þá getur hann sótt um að taka annað tungumál í staðinn fyrir Norðurlandamál. Nemendur sem fengið hafa undanþágu frá námi í Norðurlandamáli í grunnskóla geta einnig fengið undanþágu frá Norðurlandamáli í framhaldsskóla. Þeir skulu þó taka aðra grein í staðinn. Vakin er athygli á því að undanþága frá einstaka námsáföngum getur skert möguleika nemenda til náms í skólum á háskólastigi eða möguleika til starfa á viðkomandi starfs­sviði ef um starfsnám er að ræða. Á prófskírteini nemanda skal gera sérstaka grein fyrir undanþágum sem veittar eru samkvæmt framansögðu. 2. Stjórn skólans og þjónusta við nemendur Fjölbrautaskólinn í Breiðholti býður fram fjölbreytt nám og er einn stærsti framhaldsskóli landsins. Undanfarin ár hafa rúmlega tvö þúsund nemendur stundað þar nám á ári hverju og notið handleiðslu 120–130 kennara. Ljóst er að margir aðilar koma að rekstri slíkrar stofnunar auk kennara. Nauð­synlegt er að nemendur kynni sér vel hvernig stjórn skólans er háttað, hvaða þjónustu hann býður upp á og hverjir veita þá þjónustu. Allar tilkynningar til nemenda eru hengdar upp á auglýsingatöflu í aðalanddyri skólans og eru birtar á sjónvarpsskjá og eru nemendur hvattir til að fylgjast vel með öllum tilkynningum frá stjórn skólans. 2.1 Stjórn skólans, skrifstofa og húsnæði Skólanefnd ásamt skólameistara er m.a. ætlað að ákveða námsframboð skólans, undirbúa tillögur til fjárlaga, ákveða skólagjöld og gera fjárhagsáætlun fyrir skólann. Skólameistari er framkvæmdastjóri skólanefndar. Einnig fjallar nefndin um ráðningu stjórnenda og kennara, setur reglur um notkun húsnæðis skólans utan skólatíma og ákveður gjald sem tekið er fyrir slík afnot. Í skólanefnd sitja fimm fulltrúar, tveir til­nefndir af borgarstjórn og þrír skipaðir af mennta­málaráðherra. Jafnframt sitja fundi nefndarinnar áheyrnarfulltrúar starfsmanna og nemenda. Skólaráð skipa skólameistari, aðstoðarskólameistari, áfangastjóri, tveir fulltrúar kenn­ara og tveir fulltrúar nemenda. Skólameistari er oddviti skólaráðs og stýrir fundum þess. Skólaráð fjallar um starfsemi skólans, skólareglur og umgengnishætti. Skólaráð afgreiðir allar umsóknir um P-áfanga og aukinn tímafjölda í töflu. Umsóknir til skóla­ráðs skulu berast á sérstökum umsóknar­eyðublöðum sem fást á skrifstofu skólans. Skólameistari veitir skólanum forstöðu og ber ábyrgð á starfsemi og rekstri skólans. Hann sér um að lögum, reglugerðum, aðalnámskrá og öðrum gildandi fyrirmælum sé fylgt. Hann hefur yfirumsjón með starfi kennara, nemenda og annarra starfsmanna skólans svo og allri áætlana­gerð, framkvæmdum og fjárráðum. Aðstoðarskólameistari er staðgengill skólameistara og annast daglega stjórnun skól­ans. Hann ber ábyrgð á stjórnun Kvöldskóla FB gagnvart skólameistara. Aðstoðar­skólameistari er tals­maður skólaráðs og sér um að starf skólans fari eftir settum reglum. Aðstoðarskólameistari ber ábyrgð á framkvæmd prófa ásamt prófstjóra. Áfangastjórar aðstoða skólameistara við framkvæmd áfangakerfisins. Þeir hafa umsjón með fjarvistabókhaldi, vali, töflugerð, námsferilsskráningu og útskrift nem­enda. Þeir hafa með höndum ritstjórn skólanámskrár. Þeir sjá um tölvuvinnslu vegna ofangreindra þátta og viðtöl vegna þeirra. Áfangastjórar hafa einnig umsjón með erlendum samskiptum. Fjármálastjóri annast fjármál skólans í samráði við skólameistara og skólanefnd. Launafulltrúi annast launamál allra starfsmanna skólans og hefur samskipti við nem­endur og fjármálastjóra vegna fjárreiða nemendafélagsins. Skrifstofa skólans er opin alla virka daga frá kl. 9:00–15:00. Skrifstofan er einnig opin á kvöldin vegna Kvöldskóla FB samkvæmt nánari auglýsingu þar um. Skrifstofan veitir almennar upplýsingar um starfsemi skólans. Þar fá nemendur vottorð til staðfestingar skólavist sinni, afrit af námsferli og umsóknareyðublöð. Þangað er skilað inn vottorðum, umsóknum til skólaráðs og óskum um námsmat. Auk þess sér skrifstofan um leigu á geymslu­skápum til nemenda. Húsvörður annast húsnæði skólans og viðhald þess og jafnframt hefur hann yfir­umsjón með ræstingu. Hann hefur einnig umsjón með opnunartíma skólans og þurfa nemendur að hafa samráð við hann um afnot af húsnæði skólans. Skólinn er opinn mánudaga til fimmtudaga frá kl. 7:30–22:30 og á föstudögum kl. 7:30–18:30. Gangavörður hefur eftirlit með húsnæði skólans frá kl. 16:00 til lokunar. 2.2 Kennsla og próf Kennarar bera ábyrgð á kennslu í þeim námsgreinum sem þeir eru ráðnir til að sinna og meta árangur nemenda í lok hverrar annar. Auk þess fylgjast þeir með ástundun nem­enda og mæt­ingu í sinni grein. Kennarar hafa viðtalstíma einu sinni í viku alla önnina. Kennslustjórar hafa umsjón með kennsluáætlunum, bókalistum, kennslu, vali á náms­efni, prófum og einkunnum og hafa frumkvæði að faglegri umræðu í deildum. Þeir veita upplýsingar um nám, kennslu og kennsluhætti innan sinnar deildar. Kennslu­stjórar hafa eftirlit með P-áföngum og meta frávik frá undanförum námsáfanga. Prófstjóri hefur yfirumsjón með prófum og úrskurðar um öll vafamál sem upp kunna að koma viðvíkjandi þeim. Prófstjóri hefur fastan viðtalstíma síðustu viku fyrir próf og á hverjum prófdegi. 2.3 Aðstoð við nám og önnur þjónusta við nemendur og aðstandendur þeirra Námsráðgjafar eru trúnaðarmenn nemenda innan skólans. Við námsráðgjöf starfa sér­­menntaðir ráðgjafar sem veita nemendum ráðgjöf og upplýsingar um nám, náms­leiðir, námsaðstoð, áhugasviðspróf, o.fl. Þeir sjá um að aðstoða fatlaða, veika og lesblinda nemendur og hafa umsjón með sérkennslu fyrir þá. Námsráðgjafar aðstoða nemendur sem eiga við persónuleg vandamál að etja eins og les­blindu, námsleiða, sálræna erfiðleika, langtímaveikindi eða fíkniefnavanda. Samvinna er á milli námsráðgjafa, hjúkrunarfræðings og forvarnafulltrúa og vísa þeir málum hver til annars ef þurfa þykir og með samþykki nemenda. Auk þess sjá námsráðgjafar um námskynningar fyrir grunnskóla, hafa umsjón með foreldrakynningu, sitja í matsnefnd og veita upplýsingar um mat á námi úr öðrum skólum. Umsjónarkennarar leiðbeina nemendum um skipulag náms og eru þeim til ráðgjafar um ýmis mál sem tengjast skólagöngu þeirra. Umsjónarkennarar aðstoða nemendur við námsval, námsáætlanir og vinnubrögð og fylgjast með námi þeirra og ástundun. Umsjónar­­kennarar hafa viðtalstíma einu sinni í viku alla önnina. Hjúkrunarfræðingur aðstoðar nemendur við mál sem tengjast líkamlegri og andlegri líðan, næringu, kynfræðslu, heilsusamlegu líferni o.fl. Æskilegt er að hjúkrunarfræð­ingur fái upplýsingar um nemendur sem haldnir eru langvinnum sjúkdómum. Hann hefur fasta viðtalstíma sem auglýstir eru á hverri önn. Hjúkrunarfræðingur er bundinn þagnarskyldu og öll samskipti hans við nemendur fara fram í trúnaði. Forvarnafulltrúi sér um að framfylgja forvarnastefnu skólans og annast skipulagn­ingu forvarnastarfs. Almennar forvarnir miða að því að koma í veg fyrir eða seinka neyslu áfengis, tóbaks og annarra fíkniefna. Forvarnafulltrúi sér um að fræða nem­endur, foreldra þeirra og kennara skólans og aðstoðar við að leita úrræða fyrir þá sem þess þurfa. Félagsráðunautur er nemendum til ráðuneytis um félagsstörf og skipulag þeirra. Hann hefur umsjón og eftirlit með samkomum nemenda sem fram fara á vegum skólans og aðstoðar nemendur við gerð fjárhagsáætlana vegna félagsstarfa. Samstarf við forráðamenn. Á hverju hausti er foreldrum nýnema boðið til kynningar­fundar í skólanum. Þar eru foreldrum kynntar helstu áherslur í starfi skólans, helstu reglur og sú þjónusta sem boðið er upp á í skólanum. Einnig fá þeir að skoða húsa­kynni skólans og hafa tækifæri til að leggja fram spurningar um skólann og skólastarfið. Forráðamenn nemenda geta fengið upplýsingar um námsgengi nemenda og annað er varðar skólagöngu þeirra en eftir átján ára aldur má aðeins veita nemendum sjálfum þessar upplýsingar. Nemendur og foreldrar þeirra nemenda sem ekki eru orðnir lög­ráða fá aðgang að upplýsingakerfi framhaldsskólanna, INNU, og jafnframt er mið­annar­mat sent heim um miðja önn. 2.4 Kvöldskóli FB Í Kvöldskóla FB er boðið fram nám á flestum brautum skólans. Þar eru gerðar sömu námskröfur og í dagskóla en kennslu­stundir eru í allflestum tilfellum helmingi færri. Kennslutími í kvöldskólanum er frá kl. 18:00–22:30 mánudaga til fimmtudaga. Innritun fer fram í upphafi hverrar annar samkvæmt nánari auglýsingu í fjölmiðlum. Tveimur vikum eftir að kennsla hefst eiga allir nemendur að hafa skráð sig til náms hjá viðkomandi kennara. Samkvæmt reglum skólans er nemendum ekki leyft að hlaupa yfir námsáfanga heldur verða þeir að standa skil á öllum prófum og verkefnum yfir önnina og staðfesta kunnáttu sína á annarprófum. Allar tilkynningar til nemenda eru hengdar upp á auglýsingatöflu í aðalanddyri skólans og eru birtar á sjónvarpsskjá og eru nemendur hvattir til að fylgjast vel með öllum tilkynningum frá stjórn skólans. 2.5 Aðstaða fyrir nemendur Bókasafn er upplýsingamiðstöð fyrir nemendur, kennara og annað starfsfólk skólans og er undir umsjón bókasafnsfræðinga. Þar fá nemendur þjálfun í að leita upplýsinga á sjálfstæðan hátt, t.d. í bókasafnskerfi safnsins, í handbókum, á margmiðlunardiskum og í gagnabönkum á Netinu. Allir nýnemar fá safnkennslu þar sem safnkosturinn er kynntur og möguleikar á notkun hans. Safnið er opið alla virka daga og þar eru sæti fyrir um 80 nemendur. Á safninu eru tölvur tengdar Netinu. Auk þess er hlustunaraðstaða fyrir nemendur. Við inngang safnsins er ljósritunarvél sem nemendur geta notað ef þeir kaupa ljósritunarkort. Flest gögn safnsins eru til útláns og er lánstími yfirleitt tvær vikur. Gögn, sem ekki eru til útláns, eru t.d. handbækur, orðabækur, námsbækur, ný tímarit o.fl. Tölvuver skólans er að jafnaði opið í nokkrar klukkustundir alla virka daga samkvæmt nánari auglýsingu. Allir nemendur fá aðgangsorð að tölvukerfi skólans og póstfang. Auk þess fá nemendur aðgang að INNU, upplýsingakerfi framhaldsskólanna, og geta þar skoðað upplýsingar um nám sitt, val og viðveru. Bóksala skólans hefur allflestar kennslubækur til sölu jafnt nýjar sem notaðar. Bók­salan hefur starfsemi nokkrum dögum áður en kennsla hefst í upphafi hverrar annar og er afgreiðslutími auglýstur hverju sinni. Stærðfræðiver er að jafnaði opið tvo daga í viku. Tveir nemendur eru þar alltaf til að­stoðar þeim sem á hjálp þurfa að halda og eru þeir sem eiga í erfiðleikum með stærð­fræði eða raungreinar hvattir til að mæta. Mötuneyti fyrir nemendur er á jarðhæð skólans. Undirheimar eru í kjallara Breiðholtslaugar og er þar aðstaða fyrir nefndir og félags­starfsemi nemendafélagsins. Einnig geta allir nemendur skólans komið þangað til skrafs og ráðagerða, leikja og skemmtana. Bílastæði nemenda eru sunnan og vestan megin við skólann, við sundlaug, íþróttahús og skólasmiðju við Hraunberg. Athuga ber að bílastæði fyrir framan skólann meðfram Austurbergi eru eingöngu ætluð starfsmönnum skólans. Bifreiðar nemenda verða dregnar burt á kostnað eigenda sé þeim lagt í stæði starfsmanna og það sama gildir ef lagt er í bifreiðastæði við fjölbýlishús eða önnur einkastæði í nágrenninu. 2.6 Stjórnunarhættir og gæðaeftirlit Fjölbrautaskólinn í Breiðholti hefur á stefnuskrá sinni að útfæra leiðir til þess að meta innra starf skólans. Sjálfsmatskerfi skólans er í mótun en reglulega eru gerðar kann­anir á viðhorfum nemenda, kennara og starfsmanna á einstökum þáttum skólastarfsins eða á skólastarfinu í heild. Skólameistari boðar starfsfólk reglulega í starfsviðtöl. Unnið er með niðurstöður kannananna þannig að reynt er að laga þá hluti sem fá neikvæðasta gagnrýni og skerpa á hlutum sem fá góða gagnrýni. Á hverju skólaári heimsækja skólameistari og aðstoð­arskólameistari deildir skólans til þess að ræða starfsemi og stefnumótun þeirra. Ítarlegur og endurskoðaður starfsmanna­bæklingur fyrir starfsmenn FB er gefinn út á haustönn hvert ár. Þar koma fram ýmsar gagnlegar upplýsingar fyrir starfsmenn skólans. Á hverri önn fer fram miðannarmat allra nemenda skólans. Nemendur eru metnir í öllum áföngum og niðurstöðurnar síðan sendar heim til nemenda yngri en 18 ára, en allir nemendur fá þó matið afhent í skólanum. Í miðannarmatinu kemur fram staða nemenda í einstökum áföngum svo og mæting þeirra. 3. Mikilvægar skólareglur Í Fjölbrautaskólanum í Breiðholti gilda ákveðnar reglur um samskipti og umgengni og eru nemendur hvattir til þess að kynna sér þessar reglur strax í upphafi og fara eftir þeim. Samskipta- og skólareglur í FB eiga það sameiginlegt að byggja á gagnkvæmri virðingu nemenda, kennara og annars starfsfólks. Auk þess er andi þeirra sá að hvetja til góðrar umgengni, tillitssemi og umburðarlyndis. Það er stefna FB að stuðla að því að allir sem þar starfa, nemendur, kennarar og annað starfsfólk, umgangist hver annan af kurteisi og tillitssemi. Nemendur og aðrir sem leita eftir þjónustu skrifstofu, bókasafns og mötuneytis eiga að finna gott og vin­sam­legt viðmót. Á sama hátt er ætlast til þess að allir þeir sem leita eftir þjónustu geri það á kurteislegan hátt og sýni skilning og biðlund ef ekki er hægt að sinna erindum þeirra samstundis. 3.1 Skólareglur Í Fjölbrautaskólanum í Breiðholti eru gerðar eftirfarandi kröfur til nemenda: Nemandi - skal sýna skólasystkinum sínum og starfsfólki skólans tillitssemi og kurteisi í daglegum samskiptum - skal stunda nám sitt samkvæmt kennsluáætlunum og hlíta fyrirmælum kennara - skal forðast allt sem veldur truflun í skólastarfinu - skal ganga vel um húsnæði, tæki og annan búnað skólans - skal virða reglur um bann við neyslu áfengis og annarra vímuefna í skólanum á samkomum og ferða­lögum á hans vegum - skal virða bann við reykingum og tóbaksnotkun í og við skólann - skal fylgja umgengnisvenjum skólans m.a. að neysla matar, drykkja og sælgætis er bönnuð í kennslustofum - skal virða bann við notkun farsíma í kennslustundum og prófum Ítrekuð brot nemenda á skólareglum geta leitt til brottvísunar úr skóla að undan­genginni viðvörun. Nemandi sem brýtur almenn hegningarlög í skólanum getur átt von á tafarlausri brottvísun úr skóla ef brotið er þess eðlis að viðvörun verður ekki við komið. Undirritun umsóknar er staðfesting þess að nemandinn hafi kynnt sér náms­fyrir­komulag í skólanum og muni virða reglur hans um hegðun, ástundun og skólasókn. Nemandanum er tilkynnt eins fljótt og verða má hvort hann fær skólavist eða ekki. Fái nemandi jákvætt svar er greiðsla skólagjalds endanleg staðfesting á því að hann þiggi skólavist og hlíti reglum skólans. 3.2 Réttur kennara til að halda vinnufrið í kennslustundum Kennarar skólans eru verkstjórar í kennslustundum - það er réttur kennara og nemenda að vinnufriður ríki í kennslustundum - heimilt er að færa í sundur einstaklinga sem trufla - heimilt er að vísa nemanda úr kennslustund valdi hann truflun og ónæði - heimilt er að neita nemanda sem vísað hefur verið úr kennslustund vegna ónæðis eða óróa um að sækja tíma í viðkomandi áfanga, neiti nemandi að breyta hegðun sinni - ítrekuð truflun í kennslustundum getur leitt til brottvísunar úr skóla 3.3 Kvartanir nemenda Ef nemandi telur sig ekki geta rætt beint við kennara sinn um atriði sem honum finnst að betur mættu fara, eða telur sig ekki hafa fengið viðeigandi lausn eftir að hafa rætt við kennarann, getur hann snúið sér til umsjónarkennara síns, námsráðgjafa eða stjórnenda. Nemandinn skal þá hafa eftirfarandi að leiðarljósi: Skýrar kvartanir (t.d. skortur á verkefnum, tilhögun prófa, kennsluáætlun sem ekki er fylgt, ósanngjarnt námsmat o.fl.) berist til aðstoðarskólameistara sem ræði þær við við­komandi kennara. Ef ekki næst samkomulag má vísa málinu áfram til skóla­meistara. Óljósar kvartanir (t.d. framkoma kennara við nemendur, óskýr kennsla eða framsetning efnis) berist til námsráðgjafa. Aðstoðarskólameistari og námsráðgjafi ræði við viðkomandi kennara á formlegum fundi ef ástæða þykir til. Námsráðgjafi meti í samráði við aðstoðarskólameistara hvenær nóg er að gert og niðurstöður ásætt­an­legar fyrir alla aðila. Ef ágreiningur er um hvort niðurstöður eru ásættanlegar er málinu vísað til skólameistara til frekari úrvinnslu. Nemendur geta snúið sér beint til námsráðgjafa eða stjórnenda með kvartanir. Þeir geta einnig rætt við umsjónarkennara sína og fengið aðstoð þeirra. Námsráðgjafar og umsjónarkennarar eru hafðir með í ráðum við lausn ágreiningsmála sem varðar skjól­stæðinga þeirra. 3.4 Um samskipti nemenda, kennara og annarra starfsmanna Rísi ágreiningur milli nemenda, kennara og/eða annarra starfsmanna skólans og takist hlutaðeigandi ekki að finna lausn á málinu skal því vísað til skólameistara. Uni máls­aðilar ekki niðurstöðu skólameistara má vísa málinu til menntamálaráðuneytisins. Komi fram kvartanir eða kærur vegna samskipta nemanda/nemenda og skóla­meistara og takist ekki að leysa málið innan skólans skal því vísað til úrlausnar menntamála­ráðuneytisins. Telji nemandi eða forráðamenn hans, sé nemandinn yngri en 18 ára, að brotið hafi verið á rétti nemandans, þannig að ástæða sé til að bera fram kvörtun skulu þeir snúa sér til viðkomandi kennara, umsjónarkennara eða skólameistara. Takist ekki að leysa málið tekur skólameistari það til umfjöllunar og ákvarðar um viðbrögð. Með sama hætti skal kennari eða annar starfsmaður skólans, sem telur að brotið hafi verið á rétti sínum með einum eða öðrum hætti, koma kvörtun sinni til skóla­meistara. 3.5 Um námsframvindu nemenda í Fjölbrautaskólanum í Breiðholti Ágreiningsmál um námsframvindu eða undanþágubeiðnir skulu koma til umfjöllunar í skólaráði. Umsögnum skal komið til skólameistara sem sker úr um slík mál. Uni nem­andi ekki þeim úrskurði má vísa málinu til menntamálaráðuneytisins. 3.6 Skólasókn Nemendur skulu sækja allar kennslustundir í þeim áföngum sem þeir hafa í stundaskrá sinni og koma stundvíslega til kennslu. Nemendur verða að mæta í a.m.k. 80% kennslustunda. Í einstökum áföngum eru þó strangari mætingareglur og eru þær tilgreindar í námsáætlunum. Hér er t.d. um að ræða íþróttir, verklega áfanga og próflausa áfanga. Skólasóknareinkunn byggist á því hversu margar kennslustundir nemandi hefur í stundaskrá. Nemandi sem er með yfir 95% mætingu fær A í skólasókn og eina einingu. Nemandi með 90% - 95% mætingu fær B í skólasókn. Nemandi með 85% - 90% mætingu fær C í skólasókn og nemandi með 80%- 85% mætingu fær D í skólasókn. Ef nemandi fer niður fyrir 80% mætingu (þegar búið er að draga frá veikindavottorð og leyfi) er hann fallinn á önninni og fær einkunnina E í skólasókn. Hann verður þá að hafa samband við skólameistara eða aðstoðarskólameistara og gera grein fyrir fjarvistum sínum. Nemandi sem hverfur frá námi án vitneskju skóla­meistara, hefur fyrirgert rétti sínum til áframhaldandi náms við dagskóla Fjöl­brauta­skólans í Breiðholti. Nemendur geta sótt um leyfi frá námi í dagskóla FB. Best er að sækja um leyfið á valdegi, en annars tímanlega áður en skóli hefst. Veikindi Til að fá niðurfellda fjarvistaskráningu vegna veikinda þarf að skila inn læknis­vottorðum eða staðfestingu frá foreldri eða forráðamanni sé nemandi undir 18 ára aldri. Vottorðin eru metin þannig að fyrstu tveir dagarnir eru ekki dregnir frá. Skila þarf læknisvottorðum á skrifstofu skólans innan fimm daga frá lokum veikinda. Ef nemandi er veikur í viku eða lengur á hann að láta skrifstofuna vita símleiðis, og skila síðan vottorði að loknum veikindum. Reglur um niðurfellingu fjarvista af öðrum ástæðum en veikindum. Stjórnendur skólans geta heimilað að felldar séu niður fjarvistir að öllu leyti þegar nemendur hafa verið fjarverandi í eftirfarandi tilvikum: 1. Vegna náms- og keppnisferða á vegum skólans (ferðir skipulagðar af NFB samþykktar af skólastjórnendum falla hér undir). 2. Vegna þátttöku í, eða undirbúnings fyrir, íþróttakeppni á vegum landsliðs eða íþrótta­félags, enda liggi fyrir staðfesting á slíkri þátttöku frá viðkomandi sérsambandi eða íþróttafélagi. 3. Vegna ófærðar eða annarra óviðráðanlegra tilvika, enda geti nemandi skýrt og stað­fest þá töf sem hann varð fyrir. 4. Vegna útfarar nákomins ættingja eða vinar. 5. Vegna veikinda barns sem nemandi á eða hefur á framfæri. Staðfest með læknis­vottorðum. 6. Vegna tiltekinna starfa í stjórn NFB að fengnu leyfi skólameistara. Úrsögn úr áfanga Nemendur geta sagt sig úr áfanga í fyrstu kennsluviku á hverri önn, án þess að það hafi nokkrar afleiðingar. 3.7 Um undanþágu frá líkamsrækt fyrir íþróttafólk Nemandi sem stundar umfangsmikla líkamsþjálfun á vegum sérsambands og/eða íþrótta­­félags undir stjórn sérmenntaðs þjálfara, íþróttafræðings eða kennara, samhliða námi í framhaldsskóla, getur óskað eftir því að vera undanþeginn vissum áföngum eða áfanga­hlutum í íþróttum, líkams- og heilsurækt. Fyrir upphaf námsannar þarf nemandi að skila til skólans þjálfun­aráætlun sem þjálfari viðkomandi sérsambands eða íþróttafélags hefur staðfest. Skóla­meistari tekur ákvörðun um, í samráði við kennslustjóra í íþróttum, hvort tilefni sé til eða að hve miklu leyti beri að meta þjálfun íþróttamannsins í námi í viðkomandi áföng­um eða áfangahlutum í íþróttakennslu skólans. Við lok námsannar ber nemanda að skila inn staðfestingu frá viðkomandi þjálfara að ástundun og árangur hafi verið í samræmi við áætlunina. Að hámarki geta nemendur fengið eina námseiningu metna vegna þjálfunar sinnar, fyrir hverja námsönn á meðan þeir eru í námi í framhaldsskóla, þó aldrei fleiri en átta einingar. 3.8 Einingafjöldi á önn Miðað er við að eðlilegur námshraði sé 18 einingar á önn að meðaltali og skulu nem­endur ekki velja færri en tólf einingar eða 24 kennslustundir. Til að ljúka námsönn þarf að standast a.m.k. níu einingar og ná 80% skóla­sókn. Að öðrum kosti þurfa nemendur að endurtaka alla áfanga annarinnar. Áfangar, sem lokið er með einkunninni 7 eða hærri, teljast þó alltaf staðnir. Nemendur, sem falla á önn, verða að sækja um skólavist að nýju og ekki er tryggt að þeir verði teknir í skólann aftur. Nemendur, sem óska eftir fleiri tímum í töflu eða P-áföngum - utanskólanámi, þurfa að sækja um það sérstaklega til skólaráðs. Skólaráð afgreiðir þessar umsóknir um leið og niður­stöður annar­prófa liggja fyrir og auglýsir þær þegar val er staðfest. Nemendur geta þá breytt vali sínu í samræmi við afgreiðslu ráðsins. 3.9 Einingafjöldi á önn Skólum er heimilt að meta til eininga umfangsmikil störf á vegum nemendafélags, svo sem formennsku í félaginu og setu í stjórn þess, formennsku í félögum eða klúbbum sem starfa á vegum nemendafélags, ritstjórn skólablaðs, þátttöku í keppni á borð við keppnina "Gettu betur" svo og annað framlag til skólastarfsins af líkum toga sem talið er vert sérstakrar viðurkenningar með námseiningum. Einingar sem gefnar eru sam­kvæmt þessari heimild má taka af frjálsu vali nemenda en bætast ella við tilskilinn eininga­fjölda við námslok. 3.10 Forvarnastefna Fjölbrautaskólans í Breiðholti Það er markmið Fjölbrautaskólans í Breiðholti að allir nemendur fái notið sín í námi og að líkamleg og andleg vanlíðan eða félagslegir erfiðleikar séu þar í sem minnstum mæli Þrándur í götu. Fjölbrautaskólinn í Breiðholti vill taka á vímu­efna­vand­anum með eftirfarandi hætti: - nemendur fá fræðslu um skaðsemi vímuefna á fyrstu tveimur árum sínum í skólan­um - fræðslan verði sem mest í grunnáföngum skólans - skólinn setur sér það mark að hvetja nemendur til vímuefnalauss lífernis - áhersla á stuðning við heilbrigt félagsstarf - stjórn nemendafélagsins, félagsráðunautar, kennarar og stjórnendur beiti sér gegn því að nemendur komi undir áhrifum vímuefna á skóladansleiki og aðrar skemmtanir á vegum skólans - kennarar og aðrir starfsmenn skólans fái fræðslu um vímuefnavarnir - kennarar og aðrir starfsmenn grípi inn í óheillavænlega þróun í vímuefnaneyslu nem­enda sinna eftir því sem hægt er og starfssvið þeirra leyfir - leiki grunur á að nem­andi eigi við vímuefnavanda að stríða skal vísa honum til námsráðgjafa, hjúkrun­ar­fræðings eða for­varna­fulltrúa skólans - samstarf við heilsu­gæslu og félagsmála­yfirvöld verði eflt - nemendur skólans hafi ávallt aðgang að upplýsingum eða ráðgjöf um viðbrögð hafi þeir áhyggjur af vímuefnaneyslu sinni eða annarra - forvarnastefnan er kynnt fyrir nemendum þegar þeir hefja nám við skólann - skólastjórnendur sjá til þess að forvarnastefnunni sé framfylgt 3.11 Starfsáætlanir Starfsáætlanir skólans eru kynntar á heimasíðu skólans, www.fb.is, og er þar áætlun um skólastarf hvers skólaárs, skóladagatal, þ.e. upplýsingar um kennsludaga, próf­daga, frídaga og mikilvæga fundi á skólaárinu. Á heimasíðu skólans er einnig að finna kennsluáætlanir í öllum námsáföngum í dag- og kvöldskóla. 3.12 Umhverfismennt Fjölbrautaskólinn í Breiðholti leggur áherslu á vistvænt umhverfi. Leitast er við að haga innkaupum á þann hátt að keyptar eru vistvænar rekstrarvörur eins og kostur er s.s. hreinlætisvörur og pappír. Einnig er lögð áhersla á hagkvæmni í orku- og vatns­notkun skólans. Sorp er flokkað og lögð er áhersla á að fegra umhverfi skólans. 3.13 Jafnréttisstefna Fjölbrautaskólans í Breiðholti Fjölbrautaskólinn í Breiðholti leitast við að hafa í þjónustu sinni sem hæfast starfsfólk á hverjum tíma. Konur og karlar standa jöfn að vígi hvað varðar ráðningu til starfa, vinnuaðstöðu, möguleika til símenntunar og starfskjara. Til þess að ná ofangreindum markmiðum er það stefna skólans að fylgja eftirfarandi stefnu í jafnréttismálum: · Hlutfall kynja skal vera sem jafnast á starfssviðum skólans · Bæði kyn hafi sömu möguleika til starfsframa · Konur og karlar hafi sömu möguleika til starfsþjálfunar og símenntunar til að auka hæfni sína í starfi · Karlar verði hvattir til að taka fæðingarorlof í samræmi við gildandi heimildir · Bæði kyn hafi sömu möguleika til bættra starfskjara · Einelti og kynferðisleg áreitni verði ekki liðin í Fjölbrautaskólanum í Breiðholti Tengiliður skólans í jafnréttismálum er Berglind Halla Jónsdóttir, áfangastjóri. 3.14 Samstarf við aðra skóla Skólinn leitast við að hafa samstarf við aðra skóla innanlands sem utanlands á breiðum grunni. Skólinn á gott samstarf við grunnskóla í hverfinu og leitast við að halda upp góðum samskiptum við skóla hérlendis á háskólastigi. Samskipti kennara, nemenda og stjórnenda um málefni fram­halds­skólastigsins er einnig mikilvægt að rækta á jafnréttisgrunni. 3.15 Samstarf við aðila á vinnumarkaði Skólinn leitast við að eiga gott samstarf við aðila á vinnumarkaði um starfsþjálfun nemenda á starfsnámsbrautum. Skólinn leggur einnig áherslu á að eiga samstarf við starfsgreinaráð og aðila atvinnulífs um skipulag og áherslur starfsnáms. Skólinn leitast við að búa vel að starfsnámi í skólanum með góðum tækjum, aðstöðu og vel mennt­uðum kennurum. Skólinn telur mikilvægt að eiga góð samskipti við starfsþjálfunar­fyrirtæki og stofnanir þannig að áherslur og markmið þeirra nýtist í þjálfun nemenda. 4. Próf Hverri námsönn lýkur með prófum en prófatíminn stendur í u.þ.b. þrjár vikur. Við próf er farið eftir ákveðnu skipulagi og um þau gilda sérstakar reglur sem mikilvægt er að fylgja í hvívetna. 4.1 Skipulag prófa Drög að próftöflu eiga að liggja fyrir í upphafi annar en endanleg próftafla er gefin út a.m.k. fjórtán dögum fyrir annarpróf og liggur hún frammi í anddyri skólans. Nem­andi, sem þarf að þreyta þrjú próf sama daginn, getur sótt um að fá að flytja próf yfir á aukaprófsdag eða í kvöldskóla. Aukapróf eru haldin næsta virka dag eftir að annar­prófum lýkur, á sama tíma dagsins og viðkomandi dagskólapróf var í próftöflu. Þeir sem veikjast í prófum geta tekið próf á aukaprófsdegi gegn framvísun læknis­vottorðs. Þeim ber að tilkynna veikindin samdægurs eða næsta virkan dag eftir viðkomandi próf og eru þeir þá skráðir í próf. Þeir sem óska eftir að flytja próf yfir á þennan dag án veikinda mega skrá sig í aukapróf á skrifstofu skólans fyrir ákveðinn, auglýstan dag gegn gjaldi sem ákveðið er af skólanefnd. 4.2 Frávik frá prófreglum Nemendur sem eiga við fötlun og/eða sértæka námsörðugleika að stríða eiga – eftir aðstæðum, rétt á sérstakri aðstoð við nám, próf og annað námsmat. Námsráðgjafar, að fenginni umsögn sérfræðinga, leggja mat á möguleika og leiðir skólans til þess að mæta þörfum hlutaðeigandi nemenda. Fatlaðir og langveikir nemendur, nemendur með lesröskun (lestrar- eða skriftar­örðug­leika) og/eða aðra staðfesta skynjunarörðugleika geta sótt um frávik frá hefð­bundnu náms­mati. Þar getur m.a. verið um að ræða sérstaka samsetningu prófa, lengri próf­tíma, sérhönnuð próf, notkun hjálpargagna, aðstoð í prófum, munnleg próf o.fl. 4.3 Prófreglur - Próf hefjast og þeim lýkur stundvíslega við hringingu. Nemendur mega ekki mæta til prófs eftir að tíu mínútur eru liðnar af próftíma. Próftími getur verið allt frá einni klukkustund upp í fjórar. Fatlaðir nemendur, veikir eða lesblindir geta sótt um lengri próftíma hjá námsráðgjöfum innan auglýsts frests. - Nemendur skulu skrá sig á sérstakan viðverulista sem yfirsetukennari leggur fyrir þá. Þeim ber að hafa persónuskilríki tiltæk þannig að kennari geti kannað þau. - Skólinn leggur til pappír og prófverkefni en nemendur ritföng og önnur leyfileg hjálpargögn. Ekkert má fá lánað nema með milligöngu kennara. - Vanda skal skrift og frágang á prófúrlausnum og þær skulu merktar fullu nafni og kennitölu. - Engir aukahlutir mega vera á prófborði eða við það. - Öll notkun síma og símboða er stranglega bönnuð í prófstofum. - Við skrifleg próf má nota þau gögn ein sem getið er um á prófverkefni. Nemandi, sem staðinn er að því að nota óleyfileg gögn eða veita eða þiggja hjálp við próf umfram það sem heimilað er, hefur fyrirgert rétti til próftöku í viðkomandi náms­áfanga og og fjallað verður um mál hans af yfirvöldum skólans. 4.4 Einkunnir Einkunnir eru gefnar í heilum tölum frá 1 til 10. Einkunnin 10 vísar til þess að 95 -100% markmiða hafi verið náð - 9 - 85 - 94% - - 8 - 75 - 84% - - 7 - 65 - 74% - - 6 - 55 - 64% - - 5 - 45 - 54% - - 4 - 35 - 44% - - 3 - 25 - 34% - - 2 - 15 - 24% - - 1 - 0 - 14% - Til að standast próf í áfanga og fá rétt til að hefja nám í næsta áfanga þarf lágmarks­eink­unnina 5. Þó er nemanda heimilt að útskrifast með einkunnina 4 (D) ef um loka­áfanga eða stakan áfanga er að ræða. Ekki er heimilt að hafa fleiri en tvær slíkar einkunnir á lokaprófsskírteini. Þessir áfangar gefa ekki einingar og verður nemandi því að afla annarra eininga í stað þeirra. Nemanda er einungis leyfilegt að endurtaka eitt próf (endurtektarpróf) ef um útskrift er að ræða. Kennurum er óheimilt að gefa nemendum upp einkunnir fyrr en á afhend­ingardegi einkunna. 4.5 Prófsýning Að loknu prófi skulu nemendur eiga þess kost að skoða prófúrlausnir sínar í viðurvist kennara. Prófsýning er venjulega sama dag og einkunnir eru afhentar. Ef fram kemur skekkja í mati eða einkunnagjöf skal slíkt leiðrétt. Ef nemandi telur einkunnagjöf kennara ósanngjarna á hann rétt á að vísa málinu til skólameistara innan þriggja daga frá prófsýningardegi. Skólameistari hlutast þá til um, að höfðu samráði við kennslu­stjóra, að hlutlaus prófdómari meti úrlausn nemandans. Úrskurður prófdómara skal gilda. 4.6 Endurtektarpróf Ef fall í einum áfanga á lokaönn kemur í veg fyrir að nemandi geti útskrifast má hann endurtaka próf í þeim áfanga. Nemandinn öðlast ekki þennan rétt fyrr en ljóst er að hann hafi náð fullnægjandi árangri í öðrum áföngum á lokaönn. Nemendur eiga ekki rétt á endurtökuprófi í próflausum áföngum ef í áfanga­lýsingu eða kennsluáætlun sem nemendur fá í upphafi annar er skýrt tekið fram að áfanginn sé próflaus en námsmatið byggist á símati sem nemendur verði að standast. 5. Félagslíf nemenda Öflugt félagslíf er nauðsynlegt hverjum skóla og á það ekki síst við um fjölmennan áfangaskóla eins og FB. Í áfangakerfi tilheyra nemendur ekki ákveðnum hópi eins og í bekkjakerfi en hins vegar hafa þeir tækifæri til að kynnast fleiri samnemendum sínum. Félagslífið gegnir mikilvægu hlutverki varðandi samskipti við aðra nemendur og getur verið lykill að því hvernig nemanda líður í skólanum og hver félagsleg staða hans er. 5.1 Nemendafélag FB Nemendur eiga kost á að vera meðlimir í Nemendafélagi FB en stjórn þess er kosin til eins árs í senn. Nemendafélagið er málsvari nemenda gagnvart yfirvöldum skólans og gætir réttar þeirra með setu í skólaráði og áheyrnarfulltrúa í skólanefnd. Innan nemendafélagsins eru starfræktar margar nefndir, hver með sína sérstöðu. Undir­­heimanefnd sér um að halda Undirheimum vistlegum og einnig sér hún um skemmtanir sem þar eru haldnar. Ritnefnd sér um útgáfu blaðsins Fréttaheims, vegg­blaðsnefnd sér um útgáfu veggblaðsins Pro et contra og árbókarnefnd sér um úgáfu árbókar sem stundum kemur út í árslok með myndum af útskriftar­nemendum. Leiklistarfélagið Aristofanes og listafélagið Moli sjá um menningar- og listviðburði innan skólans. Skemmtinefnd sér um skólaböll og aðrar skemmtanir. Videónefnd sér um að taka myndbönd af öllum atburðum í skólanum. Árshátíðin er stærsti viðburður ársins innan skólans og hefur árshátíðarnefnd veg og vanda af öllum undirbúningi hennar. Mikilvægt er fyrir nemendur að taka þátt í félagslífi skólans frá upphafi skólavistar sinnar og skrá sig í Nemendafélag FB. Þátttaka í félagslífi er ómetanleg reynsla og gott veganesti fyrir framtíðina. 5.2 Félagsgjöld í NFB Aðild að Nemendafélagi FB gefur nemendum ákveðin réttindi, dæmi: - afslátt af aðgöngumiðum að dansleikjum og skemmtunum á vegum nemenda­félagsins - afslátt af bókum í Bóksölu FB - sérstök tilboð í mötuneyti nemenda til meðlima í Nemendafélagi FB Nauðsynlegt er að framvísa kvittun fyrir greiddum skóla- og félagsgjöldum til að geta notið þessara sérkjara.